EPISODE VAKSIN PALSU/Rekaan Ruddy AS

Pamabokan geus meuweuh. Lain ukur di Kota Astina, tapi geus nerekab ka pakampungan. Rebuan barudak geus jadi korban. Maranehna perlaya lantaran nginum arak oplosan campur tai kuda.
Nagara Astinapura ginggeung. Panganggungna neanan sabab-musabab, naon anu jadi marga lantaran nerekabna pamabokan.
“ Dididik ngaji, salat malahan di pasantrenkeun di Pasantren Al-Lapasiah, pingpinan Ustad Jaenudin, angger we utah uger mabok oplosan,” ceuk Aswatama ka Si Cepot, nyaritakeun anakna, Si Bangbang Ohek anu gawena mabok wae.
“ Lain turunan ?” ceuk Si Cepot.
“ Buktina, kuring bapana, mabok tara?. Paling ukur leneng dikarokean neureuy Magadon tilu losinan,” tembal Aswatama.
“ Geuning eta ?” ceuk Si Cepot deui.
“ Apan eta mah lain nginum, da Magadon jeung ektasi mah lain inuman. Neureuy jeung nginum beda pot. Lamun Bir, Brandi, Wisky, Topi Dengdek, Orang Pikun katut oplosan tah eta inuman,” ceuk Aswatama.
Teu kungsi lila torojol Si Bangbang Ohek bari ngawih lagu H Rhoma.
“ Judi menyebabkan kemiskinan, minuman keras meyebabkan kerusakan. Sekarang kukukuku tak mau tak, tak mau tak !” cenah.
Reg ngawihna eureun sangeus nempo Si Cepot keur merong beungeutna. Top Si Ohek kana leungeun Si Cepot. Celepot dicium curukna.
“ Batur mah sun tangan, ieu ah sun curuk. Geus eureun mabokna, Jang, ? ceuk Si Cepot.
“ Hayang wae lah, Kang. Pan kuring mah mabok ti oorok,” tembal Si Bangbang Ohek bari ngaliuk kabapana.
“ Sing Bener nyarita teh,” ceuk Si Cepot deui.
Aswatama, bapana, kerung.
“ Heueuh meureun, Pot. Ti oorok sok diparaban vaksin palsu di Rumah Sakit Harapan Abah. Sigana mah, ieu budak teh mabokna ti oorok,” ceuk Aswatama.
Si Cepot gogodeg.
“ Kumaha lamun sakabeh ubarna palsu, dokterna palsu, susterna palsu, geus puguh loba duit palsu, sakola palsu, beas palsu, erloji palsu, VCD palsu, DPR palsu, pulisi palsu, Haji palsu, ajengan palsu, Beu, atuh Astina teh bisa jadi Republik Palsu. ” ceuk Si Cepot.
“ Nyaeta Pot, geus loba lalaki atawa awewe palsu ge geuningan. Aya panganten, ari keur malam pertama silih cabak, sihoreng awewe jeung awewe deui.” Ceuk Aswatama.
“ Ngacapruk, pan keur ngabahas vaksin palsu ieu teh,” ceuk Si Cepot bari ngaleos. (*)