Dongeng Situasional/Karya Ruddy AS

LOBA basa anu araneh, ceuk barudak ayeuna. Lain saukur Basa Tagalog, Cordoba, atawa Basa Sasatoan, malah anu disebut basa araneh teh, kaasup basa Sunda. Malahan, awa wanoja, lulusan Fakultas Sastra Inggris, urang Cianjur, seuseurian maca dongeng wayang kamalinaan dina ieu Koran, panyana teh seuseurian maca dongengna, sihoreng teh, Cenah, “banyak yang enggak ngerti basa Sundanya.”
“ Deuuuuh, kamarana atuh urang Sunda teh, “ ceuk Si Dewala, nurutan nu dagang tahu buleud dina mobil dogong.
Anu arahengna, jalma lain urang Cianjur, saperti Mas Gatot Subroto, mantan Katua DPRD sareng Bapa Suranto, mantal Wakil Bupati anu ayeuna nyalon Bupati Cianjur, barisaeun Basa Sunda kalayan lancar. Nyakitu deui anu sejena, Haji Pengwih, Pak Sukamto, Bapa Atat, anu disebut katurunan, kacida pisan lemes basa Sundana.
“ Wuuuuah, salah asuhan, paingan aya babasaan, wong Jowo tinggal separo, wong Sunda padalungo,” ceuk Lurah Semar.
Si Dewala nembalan.
“ Heuheuy, lolobana bakal wong bule jeung wong koneng,” cenah.
Kasaksian kusarerea, dina media masa, khususna TV, geus rayap jalma bule bari arapap-eureup ngomong basa Nasionalna. Komo deui jalma koneng mah, sasatna geus dianggap dulur sabrayna.
“ Ujang, naha ieu dongeng make nyaritakeun anu kieu sagala,” ceuk Lurah Semar ka Si Cepot.
Si Cepot tanggah.
“ Beakeun judul meureun anu ngarangna,” cenah.
“ Lah, make beakeun judul, apanan jalma di dunya harirup keneh. Sakabeh jalma ngabogaan lalakon hirup masing-masing anu bisa dicaritakeun dina ieu dongeng,” ceuk Semar.
“ Butek meureun,” ceuk Si Cepot.
“ Naha ?” ceuk Semar Pondok.
“ Teuing kurang parab atawa kurang bengsin, eta we anu jangji rek mantuan, kalahka lebeng, siga anu sieuneun kapaokan,” ceuk Si Cepot.
Lurah Semar gogodeg.
“ Teuing ari kitu mah Jang,” cenah bari indit ka masigit, rek sasapu.
“ Panyana teh rek salat sunat bapa uing teh” ceuk Si Cepot ka Si Dewala.
“ Annadlofitu minal iman, Aka. Sasapu teh sawarehna tina iman, lantaran Gusti Allah resep pisan kana kaberesihan,” ceuk Si Dewala.
“ Asa ngadengekeun ceramahna Ustad Ending Bachrudin, ngeunaheun kana ceulina teh. Sakalian hate jeung fikiran kudu disapukeun, ulah barala ku hasud jeung fitnah, eureunan ngomongkeun kagorengan batur,” ceuk Si Cepot.
Si Dewala nyangereng.
“ Kudu nyebut Aka Epot kasep kitu ?” ceuk Si Dewala.
“ Tah eta teh fitnah onyong. Geus puguh beungeut uing ruksak, hayoh disebut kasep,” ceuk Si Cepot bari meureup.
“ Aka Epot butut atuh,” ceuk Si Dewala deui.
“ Tah eta mah sarua jeung ngahina ka Gusti Allah anu ngadamel uing. Doraka pisan,” ceuk Si Cepot.
“ Ari enggeus kudu kumaha !” Si Dewala nyentak.
“Uskut, uskut,la tata’lamuun, harita ngajedog, tong ngomong. Kudu inget, letah leuwih seukeut tibatan pedang. Lamun mangihan beungeut anu siga Aka, tong diomongkeun, teuteup we nepi ka ongkek,” ceuk Si Cepot.
Gejlig, Gatot Kaca turun ti langit.
“ Sanajan bari heureuy, asa rada bener nyararita teh,” ceuk Gatot Kaca bari muril-muril kumisna.
“ Kawenehan we panginten, Gan,” ceuk Si Cepot.
Gatot Kaca ngacungkeun jempolna.
“ Tah dina raraga Pilkada, ulah sok ngumbar carita, lamun urang teu ngarti atawa elmuna can kasaba.” Ceuk Gatot Kaca.
“ Maksadna ?” ceuk Si Cepot jeung Si Dewala ampir bareng.
“ Kahiji ulah nyaritakeun timana asalna eta calon. Urang mana oge sarua, dulur sabangsa. Kadua ulah nafsir jeung naksirkeun kagorengan anu can puguh dilakonan ku maranehna. Tong make nyebutkeun, itu alus-ieu goreng da sarua jelema mah kasipatan owah gingsir, kapeung hade-kapeung goreng. Lamum ningcak dina hade, satujuan atawa tarurutan, upama ningcak dina goreng, buru-buru arelingan.” Ceuk Gatot Kaca.
Eta dua panakawan arunggut-unggutan.
“ Ulah neangan pipaseaeun nya Gan ?” ceuk Si Dewala.
“ Bener Wala, papaseaan teh kalakuan setan. Supaya jalma paraeh bari teu ngabogaan iman.” Ceuk Gatot Kaca.
“ Iman Sulaeman panginten,” ceuk Si Cepot.
Gatot Kaca molotot.
“ Heureuy teh lain dina tempatna ilaing mah, Pot,” ceuk Gatot Kaca bari molotot.
“ Atuh ari Sulaeman mah lain iman, eta mah eman nya Gan ?” ceuk Si Dewala.
Gatot Kaca nyengir.
“ Asa lieur ngada’wahan jurig jarian mah,” ceuk Gatot Kaca bari nenjrag taneuh, hiber deui ka awang-awang. ( Ras)