Hulu Sungai Citarum di Gunung Wayang Kabupaten Bandung.

Sajak kengeng Drs. H. Ayep Rukmana, M.Si.

Huluwotan Citarum

Gunung Wayang teu kungsi ngawayangkeun lalakon kendan

Ceurik balilihan handapeun tangkal tarum

Alatan ditugar kunu tugur

Cimata ngembeng kaluar tina akar

Ngaburial mapay catang

Nobros gunung meulah lamping

Kebat hilir

Cimata ngalir

Cimata Citarum

Dipake balayar ti bihari nepi ka kiwari

Nyalangkrung dina indung suku

Walungan ngabatu

Ngalingga waktu

Nyucruk palung

Meulah bantar mapay-mapay raratan

Gupay gupay kalarung-larung

Neangan boeh larang

Ditinun di saung gantung

Pamapag balebat hurung

Hurung hurung

Hariring hurung haringhang

Ngajamparing tepis wiring mamprang mamprung tepas liwung

Dimana luluhur kuring?

Rek disungsi di luhur gunung

Rek disaba mapay daratan

Sugan aya baraya di kota dulur nu di lembur

Rek amitan yen ayeuna kuring tos purna tugas ti nagara

Bakti ka rahayat mah moal waka

Cag heula

Drs. H. Ayep Rukmana, M.Si., mantan Kabid Fasilitas Peningkatan Kerjasama Desa DPMD Kabupaten Bandung.