Tarekah Ngurangan Parab di Jero Bui
— Rekaan Ruddy AS
Hieng sora sirine nyingkah-nyingkahkeun gorobag jeung padati anu keur pating arukey di jalan koral. Citrayuda tibuburanjat, nyisi. Sihoreng aya Gupernur Pandawa liwat tumpak kareta kancana nuju ka pabuen.
“ Jadol, dewek ampir kadupak bujur,” ceuk Citrayuda ka Si Cepot.
“ Tong gual geol atuh ngagusurna, kawas anu puasa bae,” ceuk Si Cepot bari leumpang rurusuhan.
“ Na akang arek kamana ?” ceuk Citrayuda.
“ Puguh rek ka pabuen, nyakseni Ama Kombayana anu rek dibere remisi ku Pa Gupernur,” tembal Si Cepot.
Citrayuda kerung.
“ Duit lain remisi teh Pot, atawa Narkoba ?” ceuk Citrayuda deui.
“ Na ari ente, kawas anu kurang gaul ?” Si Cepot malik nanya.
“ Heueuh, eta we sohorna di pabuen mah, lamun teu duit nya Narkoba,” tembal Citrayuda.
“ Remisi teh ngurangan tahanan atawa ngabebaskeun tahanan onyon,” ceuk Si Cepot bari ngahegag, capeeun.
Citrayuda cengir.
“ Euh, ngurangan parab meureun. Heueuh, duit rahayat hayoh we dipake maraban jalma jahat atuda. Eta anu geus puguh oge hukuman pati, lain geura kek atuh peuncit,” ceuk Citrayuda deui.
Si Cepot api-api teu ngadenge. Manehna ngagidig, leumpangna narikan. Pikir Si Cepot, siga heuheuh ngomongna Citrayuda teh, padahal memang betul begituh.
“ Ari jalma jujur, usah-oseh nyunyurung gorobag hayang barang hakan teh. Jalma jahat mah tinggal am-am weh, diparaban ku nagara. Beu, ambeu…….” Ceuk Citrayuda deui ngomong sorangan.
Salaku Panasehat Ahli Widang Kasurupan, Si Cepot papanggih jeung Ama Kombayana anu ngaringkuk di pabuen alatan nipu pemborong. Majarkeun rek ngaborong susukan saat, sihoreng boronganana euweuh. Ari duit komisina geus ditewak ku manehna.
“ Kabeneran Pot, ama mah embung dikurangan hukuman teh, bejakeun ka Pak Gupernur !” ceuk KOmbayana ampir ngagorowok.
“ Naha ? Batur mah nyarogok hayang bebas, ieu mah kalah embung dibere remisi ge,” ceuk Si Cepot.
“ Nyaeta Pot, asa geus mardika Ama mah, genah di dieu teh, bisa tenang ibadah, barang dahar tinggal namprak jeung teu ka kanggu ku Si Euceu, mementa balanja,” ceuk Kombayana.
“ Tambahan atuh hukumanana,” ceuk Si Cepot.
“ Kumaha carana ?”
“ Tipu ku ama tah sipir bui, api-api gering, lamun dibawa ka rumah sakit, Ama api-api kabur, pasti hukumanana ditambahan,” ceuk Si Cepot.
Ama Kombayana ngacungkeun jempol. Gerebek api-api kasurupan.
“ Hade…tah panasehat ahli. Hade Pot, ieu ama kasurupan, embung dikurangan hukuman, werrrrrrrr,” ceuk Ama Kombayana bari peperengkelan, nurutan jalma kasurupan. *