Beja ti Kahyangan, artinya kabar dari negeri para dewa. Kahyangan memang tempat bersemayamnya para dewa dalam dunia pewayangan dengan raja penguasanya disebut Batara Guru. Dalam kisah yang ditulisnya, Ruddy AS (RAS), mengedepankan sosok jenaka Si Cepot sebagai tokoh sentral dan kemudian mengemasnya dalam bentuk parodi situsasi yang dijamin pasti menggelitik dan bikin tersenyum pembacanya. Di antaranya seperti dalam kisah di bawah ini.
EPISODE
Hukum Pati Kendor, Duit Ngocor
Bandar Narkoba ti leuweung Dandaka ngarana Mister Padati. Duitna loba, lain ukur dipesakan tapi digelebegan. Gelebeg teh, roda padati anu ditarik ku sapi. Sapina ti Ustrali, parabna lain dedek, tapi emas-perak campur gurali.
Teretet….! Tarompet ditiup ku punggawa Astina. Algojo anu rek ngahukum pati geus ngongkorongkeun tali kana beuheung Mr. Padati.
“ Logoran saeutik,” Mr. Padati ngaharewos ka Algojo. Sigana, Algojo surti, kongkorong talina dilogoran deui.
“ Duit sapeti “ ceuk Mr Padati.
Pangacarana, Juragan Prabakesah, ngawur-ngawur duit ka barudak pangangguran. Eta barudak sina aranteng demo, anti hukuman pati sabab teu saluyu jeung Hak Asasi.
“ Na rek iraha derna modaran Bandar Narkoba teh Aka ?” ceuk Si Dewala ka Si Cepot.
“ Sigana mah engke we,” tembal Si Cepot.
“ Engke iraha, enggeus tilu taun, hayoh we tambangna teu adek-adek kana beuheungna, da dilogoran,” ceuk Si Dewala deui.
Si Cepot seuri leutik.
“ ATM, Wala, ngarti henteu ?” ceuk Si Cepot.
“ Nyaho, anu dicolokan, Borolo orok,” tembal Si Dewala.
“ Lain Borolo orok, onyon, duit…duit. Deuleu itu Si Prabakesah, pangacara, meuni reumbeuy rarangkena. Erlojina buatan Swiss, sapatu ti Itali, kesangna oge muruluk inten berlian. Sanajan nyaritana gagap, eungap kadempet ku dunya, tapi, ditarurut we ku Inohong Astina mah. Geus puguh di vonis ku Mahkamah Anggeus, make jeung hayoh we kudu bulak-balik ditenjoan deui perkarana,” ceuk Si Cepot.
Lurah Semar lalajo panghareupna. Manehna nyusutan kesang nempo anu rek ngahukum pati Bandar Narkoba can pek wae.
Disagigireun Lurah Semar, Kumendan Punggawa, Patih Sangkuni, ngajega. Curukna utek-utekan.
“ Naon anu janten marga lantaran, hukum pati teh entot-entotan, teu buru-buru dilaksanakeun?” ceuk Lurah Semar ka Patih Sangkuni.
“ Beayana Uwa teu acan turun, Proposal anggaranana can diijabah ku Kangjeng Dalem,” tembal Patih Sangkuni bari nulak cangkeng.
Lurah Semar kerung.
“ Sabara kinten biayana ?” ceuk Lurah Semar deui.
“ Saeutik Uwa, paling oge 40 milyar perakeun,” tembal Patih Sangkuni deui.
Lurah Semar ngahuleng.
“ Kanggo naon juragan, geuning meuni ageung pisan ?”
“ Ari ceuk proposal mah kieu, kahiji beaya pasukan anu ngajaga, kadua beaya mulangkeun jasadna ka kaluargana, katilu beaya ngalaksanakeunana reujeung rupa-rupa deui.” Tembal Patih Sangkuni.
Semar manyun.
“ Beu, ana kitu mah, antep wae atuh sina paeh di pangberokan. Asa ku nyaah duit sakitu gedena, meuning dipake nambalan jalan bolong di desa kawula,“ ceuk Lurah Semar bari ngaleos.
Ceuk beja, Mister Padati dilesotkeun deui tina tihang gantunganana. Kasampak manehna keur kikiplik di pangberokan, siga anu hareudangeun.
“ Barade….barade….Sabu-Sabu, Heroin, Ganja, ekstasi, pel Koplo…..nikmat…kulan. Lupa utang, lupa kabingbang, nikmati hidup bari goyang !” ceuk Mr. Padati.
Si Cepot nyampeurkeun.
“ Geuning tiasa keneh dagang di jero pangberokan ?” ceuk Si Cepot.
“ Werrrrr, leuwih aman, Pot. Moal aya anu nagkep di dieu mah,” ceuk Mr. Padati bari heuay.
Teu kungsi lila torojol Sipir Pabuen ngampeurkeun Si Cepot.
“ Punten Kang Epot, wayahna kedah kaluar ti pabuen, waktosna seep,” ceuk eta Sipir baru nempoan erlojina.
“Mangga, mung, naha geuning ieu pasakitan masih keneh tiasa dagang Narkoba di Panjara ?” ceuk Si Cepot.
Sipir Pabuen muncereng.
“ Eta mah atuda Kang, padamelanana. Sami we panginten, diluar boh dilebet oge,” ceuk Sipir Pabuen bari nyerengeh.
“ Geuning teu digebugan ?” ceuk Si Cepot.
“ Nya bilih reksak atuh digebugan mah, apan eta mah, hehehe, cocoan kawula pisan. Lumayan, sok aya jalean eh jatahan,” ceuk Sipir bari ngagiringkeun Si Cepot ka luar pabuen.
Si Cepot nyengir. Di luareun panjara manehna digimbung pareman.
“ Bagi atuh Kang, sugan aya sakepruleun atawa saseuseupeun !” ceuk eta barudak.
Si Cepot ngagedig, teu malire ka eta barudak. Sigana mah, maranehna nyangka, Si Cepot geus setor ka Bandar Narkoba anu keur nyangsaya di jero panjara. ( Ras).